香港現況其來有自

1994(中英聯合聲明發表十年後)，戴卓爾重臨香港

我在FB上引起的討論：

我回想起來，1980年代中英會談香港前途時，絕大多數香港人一開始就已經認命，覺得大陸收返是天經地義，從來冇想過有其他可能。慢慢的就自我催眠，回歸祖國的懷抱，點都好過做殖民地居民，是一條冇得拗的真理，回歸是一件很美好的事情。

1984年中英聯合聲明一出，人人都覺得真的很優待香港人，咁筍都有嘅？唔接受，真係冇理由囉！

50歲以上的香港人可以印證下，當時是不是這樣。

F：我當時得幾歲, 又唔覺得有「 咁筍都有」既感覺喎. 唔係聯合聲明一出就開始有移民潮咩? (當然八九之後更甚)

Chris： 移民的只是少數，我講的是大部份無得走個班。當時大陸開始改革開放，香港人比較下以前擔嘢上去救濟親友的情形，真係好咗好多喎！

以為一路咁發展落去，前途光明，香港50年不變，到時大陸進步晒，可以順利接軌，個陣我自己都釘啦，下一代嘅事咯.....

Y： 咁筍？香港可以有普選？我一開始都唔信，亦無信過。^^

R： 我從不信中共的謊言。奈何無法移民，只能留港！覺得上當的應是當年發民主回歸夢的傻仔。這班傻仔讀大學時，都是認祖關社的左仔！

K：當時我都係五六年班，印象中好似真係無人提過其他方式，莫講話港獨。

Chris：當時的主流心態：收，就收梗架啦，一係走，一係留。無第二條路行。

有的人就散佈「去外國，做二等公民？」的麻醉藥給自己。例如這個名作家(詳前文):

許冠傑都大唱「香港是我心 」，裡面真的有「實在極不願，移民外國，做二等公民」的一句，以取悅呢班人。


E：我當時仲係細路，但印象中好似係...現時嘅情況好似係：你一係乖乖留喺度做順民唔好嘈，一係自己搵路走唔好阻住佢地＂做嘢＂。

K：係，當時有人拋出故鄉情懷這塊牌子，好可能用來安撫留低嘅人。

Chris：所以是真的，有什麼人民，就會有什麼政府。

K：想起來，維穩功夫早就開始。

B：咁快就想當年...

Chris：鑒古，才可以知今。

V：今次佔領運動雖然令人振奮，但香港仍然還有好多人認為假普選也應該袋住先，認為香港的地方選舉，中央無可能唔插手，這一點是相當可悲的。

L：也不完全係，兩局議員都有去英國請願，也上京見老鄧，希望有港人參與評判；但中英都唔騷渠地，而且大陸個陣開始改革開放，大家良好願望係希望咪渠慢慢變好，和平演變。
八九一役咪掀起移民潮，走的走，唔想走的大家心裡有數，要同共產黨鬥命長。大家的抗爭手法不一樣，支援內地民運的力量從未間斷，但民運不成氣候，依家只有等大陸經濟爆煲，掀起大大大鑊的民憤，或用橫手搞中南海政變，否則單憑香港，好難成事。美國當年為左對付蘇聯，放棄中華民國，養肥呢隻中共怪物，都係一大錯。
香港人應該全民投入野貓式抗爭，不斷搗亂特衰政府的施政，放棄留守金鐘不算什麼，抗爭有好多方法。

R： 不少青年人晚晚到旺角鳩嗚，已令警察頭痛不已！

S： 我今年五十四歳，自從89年之後，一直無返過中國，97年最後一晚去左澳門，坐在酒店餐廳好唔開心睇住成班C級官員講普通話時候down到流涙。直到今日，直係比我估中國，共產黨係企在人民背脊上位。

BM：文明人用文明嘅方法與土匪鬥，真係好難鬥得羸，即使中共內部嘅開明派都最終冇好收場。中共係搞鬥爭嘅專家，佢冇底線，你有底線，同佢鬥真係好難！我推演下，由內部力量鬥贏中共的可能性，微乎其微。習江鬥爭再勁爆，都唔會給人民帶來任何好處，結果只不過由習家幫取代江家幫繼續實行殘暴統治。最大嘅機會只存在於發生第三次世界大戰，由外部力量削弱其實力，再由民間力量順勢而上，徹底終結中共統治。香港所有泛民派應該放低分歧，將佔領行動化整為零，融入日常生活嘅所有層面，俾中共睇下與民為敵嘅好處！

Y：我倒覺得當時會覺得「咁筍都有」既只有那些浪漫的「民主回歸派」, 大部分人都不信共產黨, 畢竟這批人很多都是避共產黨南來的, 怎會信共產黨?

L：「咁筍都有」一定係少數，大部份係抱著走著瞧的心態，迫到埋身就走頭。通常一個家族會最要有一二人移民鋪定後路。後來九七後中共無大動作。好多人都拿住個外國護照回流，買了政治保險回來走著瞧。

「民主回歸派」係近年激進本土派弄出來打擊民主黨的名詞，八十年代大陸開始改革開放，大家都有良好願望，希望咪渠慢慢變好，和平演變，但仍抱著走瞧的心態，那時港人都好強烈批評基本法草稿，仲去明報門口火燒基本法。

Y：係近年激進本土派弄出來打擊民主黨的名詞，呢點當然係，但事實亦都係當年冇乜人信回歸會有民主， 好似黃子華話齋好多人係覺得「好地地做乜收番」。中共肯唔收番就最好，反而有一班人就認為與其被殖民統治做二等公民，不如透過回歸爭取民主，真正做國家主人。 佢地人少，但很積極發聲，雖然中共統戰過佢地黎製造聲勢，但其實真正作用不大(反正大眾沒因為他們而歡迎「收番」)。到依家要怪罪佢地就歸納叫「民主回歸派」而已。
其實最「民主回歸」既，應該唔係民主黨，而係學聯。 因為學聯一向都左傾，直到八九年先同中共反面。

L：當然唔係，七六年共產黨宮廷政變，四人幫下台，學聯已不再親共，當時國粹派大學生才知道一直受愚弄，李怡那類原左派人士都紛紛離共而去。

Y：四人幫下台後國粹派收皮呢點大家都知，但至少同中共仲有計傾的，亦係統戰對象， 情況同李柱銘司徒華做左草委差不多。

L： 八十年代的學聯跟六七年代的學聯已不一樣，不單係四人幫下台，西單民主牆，魏京生被判刑等事件，香港大學生都醒過來，係七十年代國粹派比較盲目而已，請看看學聯的歷史。
鬼唔知中共唔收係最好,個陣仲有人提出主權換治權各種方案，但老鄧係都話要收，咁麥理浩79年訪京回港後咪大力發展香港代議政制，香港日後可以自己管自己，有高度自治，咁中英都騷香港人代表加入談判，咁都無法，咪投入代議政制，投區議會，立法會，86年搞左高一次高山大會，爭取88直選。




（....會繼續更新）