共青團又點話

（三及第文體怪論，始自專欄作家三蘇（原名高少敏，其他筆名有高雄、小生姓高、史得、周弓、吳起等）。他是50年代上海南來香港的作家，能日產萬言，同時為多家報紙寫不同題材和風格的小說和雜文。所謂「三及第」，是混合文言、白話和廣東話的文體。所謂「怪論」，就是立論與眾不同，有時正言若反，令讀者嘻哈絕倒，在50－60年代獨步文壇，後來仿效這種風格的，有明報的「哈公」，現在的陶傑都是。）

初次嘗試，一定寫得不好，請諒。

本週香港大學，會由全體同學，投票選出2015年幫大家做事嘅學生會內閣。如同以往，有兩個競選內閣出陣，叫「明峰」與「Smarties」，所有職位都有擬定人選，唔駛大家逐個選咁麻煩。A餐或B餐？二者選其一即可焉。

Smarties個名，即係細路仔鍾意食的朱古力「聰明豆」，改得咁得意，當中有個想做康樂秘書嘅女生，叫「葉璐珊」，英文名 Eugenia Yip，都幾好樣也，殊不知道因為佢搞到滿城風雨......


有人爆料，話佢乃內地生，個姓係用簡體字，「叶」，英文拼音係 Ye，但競選活動之中特登寫返「葉」，仲改埋香港英文拼法 Yip，冒充香港人喎。

計我話，葉同學咁做，乃表示入鄉隨俗，尊重香港本土文化者也，你班友咪成日笑大陸「殘體字」嘅？應該大大表揚才是。

仲有樣大新聞，話查出葉同學係共青團團員！佢後來都承認，仲話內地生有99%係共青團團員。於是有班人呱呱嘈，話咩嘢「染紅學生會」，好似大難臨頭咁。

其實入共青團，你估話咁易乎？要成績好，身家清白至得者也。內地生出得來留學，唔係猛龍唔過江，入讀香港最高學府，係共青團團員有咩出奇乎？

成個Smarties內閣，就得葉同學一個內地生，又唔係做「車佬」（Chairman），反對者使乜神經過敏。講到尾，學生會憲章，有邊條話留學生唔做得學生會幹事？

而家港大學生之中，內地生佔咗幾成，冇佢地支撐學額，真係教職員同洗廁所阿嬸都會請少幾個。校園之內普通話係強勢語言，連其中一間學生餐廳，都俾人話個收銀員只識講普通話。

所以，成個內閣就得一個葉同學，實在太少。2016年下一屆應該搵多幾個，加強代表性，先至合乎比例焉。 

...............................................................

*倘有留言未能即時上板，是自動過濾去了spam之故，諸君稍安無躁，版主每日檢查幾次，一有發現便會救回*  

(文章允許轉貼，請具作者名字：梁煥松)