2014年8月24日 星期日

古文粵譯:辨姦論

辨姦論  (宋.蘇洵)

事有必至,理有固然。惟天下之靜者,乃能見微而知著。
每件事有其必然結果,樣樣都有得解。世界上只有冷靜既人,先能夠係微細跡像之中,睇得出D緊要既野。

月暈而風,礎潤而雨,人人知之。
月光週圍有光環,預示會翻風;柱濕立立,就快落雨;呢D道理,人人都識。

人事之推移,理勢之相因,其疎闊而難知,變化而不可測者,孰與天地陰陽之事?
世間人事變化,情理形勢、因果關係,好抽象玄妙,難以理解;當中千變萬化,無法預測,又點同能與自然現象既變化相比呢?

而賢者有不知,其故何也?好惡亂其中,而利害奪其外也。
即使賢人,都會有所不知點解呢?因為愛好同憎惡,擾亂左個心;計較利害得失,又會影響佢既決定。

昔者山巨源見王衍曰:「誤天下蒼生者,必此人也!」
舊陣時,山濤見完王衍咁講:「日後為害天下蒼生,梗係呢個人!」

郭汾陽見盧杞曰:「此人得志,吾子孫無遺類矣!」
郭子儀見過盧杞,之後就話:「呢條友俾佢一朝得志,我咸家剷都有份!」


自今而言之,其理固有可見者。以吾觀之,王衍之為人,容貌言語,固有以欺世而盜名者。然不忮不求,與物浮沉。
今日睇返轉頭,的確見到其中道理。計我話呢,王衍的為人,容貌或談吐都唔曳,可以利於欺世盜名,但係佢不妒忌、無貪污,無隨波逐流喎。

使晉無惠帝,僅得中主,雖衍百千,何從而亂天下乎?
假如晉朝當時唔係惠帝當政,只要君主具備中等才能,即使有多幾百個王衍,又點能擾亂天下呢?

盧杞之姦,固足以敗國;然而不學無文,容貌不足以動人,言語不足以眩世,非德宗之鄙暗,亦何從而用之?
盧杞咁既奸臣,固然足以使國家敗亡,但此人不學無術,貌非出眾,言談不足以影響社會,如果唔係唐德宗鄙陋昏庸,斷估佢點會得到重用呢?

由是言之,二公之料二子,亦容有未必然也。
從這一點來講,山濤和郭子儀對王衍和盧杞既預料,都未算完全正確。

今有人,口誦孔、老之言,身履夷、齊之行,收召好名之士、不得志之人,相與造作言語,私立名字,以為顏淵、孟軻復出;
現在有D人,把口成日引述孔子同老子既話,扮晒伯夷、叔齊既清高行為,吸鈉追求名聲、鬱不得志既人,互製造輿論同吹捧,以顏回、孟子再世自居;

而陰賊險狠,與人異趣,是王衍、盧杞合而為一人也,其禍豈可勝言哉?
實際上,佢地陰險凶狠,同正常人完全不同,直情係將王衍、盧杞既缺點集於一身,呢班契弟搞出既災禍,真係數到口乾都講唔完。

夫面垢不忘洗,衣垢不忘澣,此人之至情也。
塊面污糟而不忘洗臉,件衫污糟不忘洗衣,人人都會係咁。

今也不然,衣臣虜之衣,食犬彘之食,囚首喪面,而談《詩》、《書》,此豈其情也哉?
現在唔同晒,有人著住罪犯既衫,食豬狗飼料,賊眉賊眼,買水咁既面口,而大談《詩經》、《尚書》,真係咁都得?

凡事之不近人情者,鮮不為大姦慝,豎刁、易牙、開方是也。以葢世之名,而濟其未形之患。
凡是做事不近人情,很少話唔係作奸犯科,豎刁、易牙、開方就係呢亭人。佢地借助崇高名聲,來包裝暗藏既禍患。

雖有願治之主,好賢之相,猶將舉而用之,則其為天下患,必然而無疑者,非特二子之比也。
雖然有願意實施良政既君主、尊重人才既宰相,仲係會推舉、任用這類人。正因為咁,佢地為禍全世界就梗架啦,仲衰過王衍、盧杞之流多多聲添。

孫子曰:「善用兵者,無赫赫之功。」
孫子講過:「善於用兵的人,(反而)無顯赫戰功。」

使斯人而不用也,則吾言為過,而斯人有不遇之歎,孰知禍之至於此哉!
假如呢類人得唔到重用,算我預測錯了,佢地就會大嘆懷才不遇,點會有人知道(如果俾佢地上到位)會咁大鑊呢?

不然,天下將被其禍,而吾獲知言之名,悲夫!
否則,(真係俾我講中既話)全世界都會俾佢地害到雞毛鴨血,到時先話我料事如神,咁就太可悲咯! 


10 則留言:

  1. 最後 "GA" 是"你"嗎?

    "善用兵者,無赫赫之功。"

    為什麼善用兵者反而無赫赫之功呢?不戰而勝嗎?



    G

    回覆刪除
    回覆
    1. GA是手多多打錯的。
      善用兵者,無赫赫之功,
      即是說善用兵者,之前已用形勢和戰略,嚇到敵人不敢開戰,不需要真的大打一場。.

      刪除
    2. 可惜, 呢種善用兵者, 化干戈於無形, 功勞實是至大但又至隱, 冇幾多個明主識欣賞...

      刪除
  2. 古來, 很多人都只遷怒於那些爪牙(奸佞如秦檜, "禍水"如妲己), 很少敢批判利用爪牙而為所欲為的人(皇帝). 蘇洵好夠膽, 直接批評皇帝. 看了這篇文章, 對他多了一層尊敬.
    此文得以流傳, 亦可見公道自在人心.

    回覆刪除
    回覆
    1. 蘇老泉的文章,削肉留骨,好用短句,十分硬淨。
      本文特別多用「而」字來連結上下句,但不是現在很多香港仔女寫文章濫用,大家請觀摩一下。

      刪除
    2. 確是多用「而」, 但其精警處 (與現在很多香港仔女寫文章比較), 還請賜教.

      刪除
    3. 「而」指正確用法是連接用,上句講一件事,下句有個轉折,有少少意外之感,又未到用「但是」的程度。

      刪除
    4. 解得清楚, 謝謝賜教. :)

      刪除
  3. 分不清姦和奸的分別?

    回覆刪除
    回覆
    1. 古代姦、奸通用,
      近代分清是強姦、姦淫,奸惡、奸黨。
      但是大陸又二合一為「奸」。

      刪除