2014年5月12日 星期一

古文粵譯:大同與小康

禮運大同篇 (禮記 禮運篇)


昔者,仲尼與於蜡賓,事畢,出遊於觀之上,喟然而歎。仲尼之歎,蓋歎魯也。
舊時孔子參加魯國歲末祭祀,禮成之後,出去行下睇下,仲唉聲歎氣起來。 孔子咁感慨,都係為左魯國嗟。

言偃在側曰:「君子何歎?」
弟子言偃係孔子身邊,就問:「先生,因咩事歎氣啊 ?」

孔子曰:「大道之行也,與三代之英,丘未之逮也,而有志焉。
孔子:「大道實行既世代,同夏、商 、周三代賢君當政既時代, 我無經歷過,但係好嚮往!

大道之行也,天下為公。
個陣時呀,實行大道,天下係眾人共有。


選賢與能,講信修睦,
選擇賢良既人,交託治理權能俾佢;講究信義,維護和睦。

故人不獨親其親,不獨子其子;
所以人人都唔單止孝敬自己父母,唔單止愛護自己仔女;

使老有所終,壯有所用,幼有所長。
令老人能夠有人照顧到老死,壯年人能發揮所長,後生仔女能夠長大成人。

矜、寡、孤、獨、廢、疾者, 皆有所養。
老而無妻、寡婦、孤兒、獨居者、殘疾人、病人,都得到照顧。

男有分,女有歸。
男人有工做,女子嫁得出。

貨,惡其棄於地也,不必藏於己;
人民雖然唔想見到財貨棄置於地,都唔會想話據為己有;

力,惡其不出於身也,不必為己。
雖然唔想自己的勞力發揮唔出,亦都唔一定用來為自己既利益

是故謀閉而不興,盜竊亂賊而不作;
所以一切權謀都無需要,無人會用;打劫、偷竊、謀反既壞事,都無人會做。

故外戶而不閉,是謂 『大同』。
家家戶戶,就算中門大開,都無有怕。呢個,就係「大同」世界。

...............................................

今大道既隱,天下為家;
如今大道實行唔到, 天下成為一家一姓所私有;

各親其親,各子其子,貨力為己;
人人只孝敬自己父母,只愛護自己子女,財貨和勞力,都只為了自己。

大人世及以為禮,城郭溝池以為固;
統治者將個位傳給自己子孫 ,成為固定的禮制。築起城牆、挖掘溝池,保衛自己領土。

禮義以為紀,以正君臣,以篤父子,以睦兄弟,以和夫婦;
按照傳統禮義,製訂綱紀,確立君臣名分,父子恩情,使兄弟和睦,夫妻和順。

以設制度,以立田里;以賢勇知,以功為己。
設立制度,劃定田里彊界;物色勇敢聰明之士,獎勵佢地為統治者效力。

故謀用是作,而兵由此起。
係咁,陰謀詭計應運而生,戰爭亦因此而起咯。

禹、湯、文、武、成王、周公,由此其選也。
夏禹、商湯、周文王、周武王、周成王和周公,都是呢個時代既傑出人物。

此六君子者,未有不謹於禮者也。
呢六個賢人,無邊個唔係小心謹慎,遵從禮制。

以著其義, 以考其信,
做應該做既義事,證明自己有信用,

著有過,刑仁講讓,示民有常。
承認過錯,以仁為典範、講究謙讓;明確告知百姓,佢地要依循咩常規。

如有不由此者,在勢者去,眾以為殃。
邊個唔遵行呢,就算係有權有勢既人,一樣要佢下台,民眾都會當呢種人為社會禍患。

是謂『小康』。」
咁既世界,就係所謂『小康』啦。

.........................

17 則留言:

  1. 天下為公 , 食窮納稅人 , 孔子太左了 , 故人不獨親其親 , 不獨子其子;即係幫人地養埋仔 , 不負責任的男女 , 便生仔女來白食福利 , 生仔女來攞居留權 , 把父母踢入老人院 , 孔子幾千年前 , 已經幫呢班友製造道德光環 , 太可怕了

    回覆刪除
    回覆
    1. 有點誤讀。
      「不獨親其親....」意思是愛自己的家人,也愛其他人的親人。
      你說的那班是連自己的親人都不愛的,孔子推崇社會保障,不是「幫呢班友製造道德光環」。

      刪除
    2. Raymond凌晨2:37

      梁Sir, 請教,老唔老以及人之老,幼唔幼以及人之幼,有冇先後,定是一視同仁? 還是有能力再幫其他人?

      謝謝!

      刪除
    3. 儒家主張從自己的親人開始,先「老吾老」,再「以及人之老」,是有差等的愛,比較合乎人性。
      斷不會叫人丟下家中的父母不顧,走去非洲做義工的。

      刪除
    4. Raymond下午3:57

      https://thestandnews.com/culture/%E9%99%B3%E9%9B%B2%E5%8B%BF%E8%AA%A4%E4%BA%BA%E5%AD%90%E5%BC%9F/

      這句是怎樣解才對? 陳凱文的講法合理嗎? 謝謝賜教。

      刪除
    5. 「幼吾幼以及人之幼,老吾老以及人之老」
      就是一種「同理心」,推己及人的道德觀。
      凡人坐起來是從自己身邊的親人做起,這是合乎人之常情;
      但硬要強調是一種時間先後的規定,說人在照顧自己的親人時,可以漠視其他人的親人的死活,未免是捉字蝨。
      孟子是向君王進言,講的是宏觀政治,論述以同理心安天下之民。

      刪除
  2. 今大道既隱,天下為家;即係上帝死了。
    禮義以為紀,以正君臣,以設制度,以立田里;即係訂立社會契約。
    禹、湯、文、武、成王、周公,由此其選也。即係自由競爭 , 富不過三代 , 人人有機會。

    『小康』似乎較為健康。

    回覆刪除
    回覆
    1. 「大道」的時代,可能只是理想和幻想。

      刪除
    2. 即是以前沒有存在過。

      刪除
    3. Chris,即是John Lennon的Imagine?

      刪除
    4. 孔子有大同世界,同期希臘的柏拉圖有「理想國」,二者一也。

      刪除
  3. 文言文當然有價值,但先生以現代語意再演繹一次,實可為古文重添生氣。謝謝。

    回覆刪除
    回覆
    1. 不用客氣,本文為香港中學中文科範文,希望會有同學覺得有幫助。

      刪除
  4. jacolima下午1:36

    天下為公選賢與能,即係全國公開選舉人人一票,孔 johny 係民主人士.

    回覆刪除
    回覆
    1. 孔子之後不久,就有孟子民貴君輕的民主思想了。

      刪除
  5. Chris兄,

    >>>「不獨親其親....」意思是愛自己的家人,也愛其他人的親人。
    你說的那班是連自己的親人都不愛的,孔子推崇社會保障,不是「幫呢班友製造道德光環」。

    呢番金玉良言及孔子呢篇文,自由黨個粉腸李梓敬就好應該用心睇用心讀。

    未知心中事、但聽口中言,肯定呢個李粉腸絕對係個見死不救落井下石之流,不過,所謂香港既自由黨嘍囉,重會期望佢哋有人性,倒不如妓女攞牌坊還大啲可能。

    回覆刪除
    回覆
    1. 唔講猶是可,一講把幾火。

      呢條西門梓,睇見佢喺立法會,義正詞嚴咁講「自己點解要養埋其他人嘅父母」,加埋佢啲蠱惑眼神,真係想代佢父母打佢一身。

      都知豉油黨一向政治白癡,但也不至於收呢條人渣入黨吧。如不快快掃條仆街 出黨,嚟緊選舉,點會有運行。

      刪除