2013年10月13日 星期日

街坊碟頭飯

一個人不舉炊之日,在外面解決一餐,最簡單就是到茶餐廳吃一碟飯了。

西人可以啃麵包飲牛奶又一餐,唐人則吃熱汽騰騰的米飯,肚子會更舒服。茶餐廳碟頭飯,最簡單的是「火腿蛋飯」,一大塊火腿稍稍加熱,煎兩隻「荷包蛋」,加幾條青菜,鋪在冒著熱汽的白飯上,灑一點豉油。

一般落單後,幾分鐘便可上檯。肚子餓的時候,覺得人間美味不外如此,大大口的吃,轉眼便可以摸著滿足的肚皮,埋單上路去也。

另一個我常吃的,是「 豆腐火腩飯」:

原料很簡單:燒肉、炸豆腐、青菜,但是做得好吃,還是有一點學問的。

通常可以用並非新鮮燒好的脆皮燒肉,隔夜的不拘,以減省成本;這個沒所謂,因為軟化了的燒肉皮,沾了汁會更好吃。

那幾方豆腐,最好是接單後即炸,而不是一早炸好雪藏,要用時才再加熱的,入口差很遠。那幾角冬菇不可馬虎---有些茶餐廳的冬菇明顯是浸得太軟太久,甚至有點酸酸的味道。青菜也要新鮮,不太久之前灼熟的

最重要的,是那個汁了,要有色、有味 、不是「杰」得像泥漿。扒飯有汁易下咽,有菜有肉有豆腐,真是寡佬恩物啊。


(文章允許轉貼,請具作者名字:梁煥松)
 ............

55 則留言:

  1. Mike Chan上午6:44

    叉燒飯,冇得頂。食極唔厭。

    回覆刪除
    回覆
    1. 叉燒要半肥瘦,燒焦一點點,好食,死就死啦!

      刪除
    2. 肥、瘦、燶!

      刪除
    3. 依家啲豬肉都唔肥,好難搵半肥瘦叉燒。

      amo

      刪除
  2. Nth 匿名上午7:21

    睇落好好味... ( 大清早就引人 流口水 兼 肚餓 ... 罪過! 罪過! )

    回覆刪除
    回覆
    1. 今日就出去食吧。

      刪除
  3. 老師,叫碟"滑蛋牛飯炒底"。

    回覆刪除
    回覆
    1. 炒底加兩蚊,老細!

      刪除
    2. “半個鬼仔”問:炒底是什麼?謝。

      刪除
    3. 即是以炒飯代替白飯。

      刪除
  4. 「 豆腐火腩飯」是和味絕配呀, 加埋支竹, 仲正呀, 材料平常易得, 妙在和味二字,
    好似香港英治時的英國佬gentleman style + 唐人文化, 如果配美國佬就會走樣, 不過點都好過配支那style

    回覆刪除
    回覆
    1. 支竹的功用也是「索」汁。

      刪除
  5. 梁sir識唔識整"茶餐廳豉油"?據講呢啲淋落碟頭飯嘅豉油嘅係經過特別處理

    回覆刪除
    回覆
    1. 各師各法。
      不過這麼好味,可能加了老抽、水、糖和味精,甚至一點燒味滴落來的油.......

      刪除
  6. 男人的浪漫, 豆付火腩飯。
    女人的浪漫, 刺身加舊飯。
    小孩的浪漫, 去玩唔食飯。
    老人的浪漫, 棺材香過飯。
    宅男的浪漫, 書展加動漫。
    宅女的浪漫, 瘦身唔食飯。
    亞爸的浪漫, 睇波當食飯。
    亞媽的浪漫, 罷工唔煮飯。
    C Y 的浪漫, 信晒中聨辦。
    地產的浪漫, 樓價升佰萬。
    特首的浪漫, 港人要就範。 
    你哋浪漫唔浪漫?

    回覆刪除
  7. happy tsang
    「溫」+「馨」

    回覆刪除
  8. 叫牛腩飯就要小心。有幾會啲牛腩是唔爛的。
    KL

    回覆刪除
    回覆
    1. 牛腩最好是早一兩日做的,如果是做好很久,結成冰塊儲存,再解凍的就不好了。

      刪除
  9. 未食過頭腐火腩飯。成日食?澳洲都有?
    細個好似唔覺,係咪近年新菜式?
    不過屋企煮過火腩炆冬瓜。材料同頭腐火腩飯差不多,
    都係燒腩、冬菰同豆腐泡,只係加咗冬瓜,但係冇支竹。
    成煲蚊起,最好味通常係冬瓜。
    Chris兄買得齊材料,可以自己試吓煮蒞送飯,喺屋企浪漫吓。

    碟頭飯幾似台灣人"口既"蓋交飯,或者依家香港都幾流行"口既"日式碗飯。
    不過人哋用碗,香港人用碟。用碗有保溫之效,似乎好少少。
    不過用碟一眼睇晒份量,如果夠多,令顧客覺得抵食。

    香港專門賣日式碗飯"口既"連鎖餐廳,好似只有吉野家。
    生意幾好;唔知點解冇其他對手入蒞競爭?

    amo

    回覆刪除
    回覆
    1. 哦,已經是很傳統的了。
      燒肉配冬瓜、苦瓜都好。
      前者清淡,後者加黑豆豉蒜頭汁獻味濃,更好送飯。

      刪除
  10. 俾你幅相加埋你枝妙筆晨早流流搞到食指大動! 係呢,呢邊一碟碟頭飯幾多銀両?

    回覆刪除
    回覆
    1. 盛惠11.50澳元,無例湯送。

      刪除
    2. 盛惠11.50澳元,差不多80港元,超貴 !

      刪除
    3. 無法啦,物離鄉貴。
      10元可以在西人Club食午餐牛扒了。

      刪除
  11. Raymond下午1:41

    小弟喜歡吃雪菜肉絲飯!

    回覆刪除
    回覆
    1. 小弟鍾意燒鵝飯! 嘿嘿!

      刪除
    2. 哈,都是食飯一族!

      刪除
  12. Chris 兄那碟「豆腐火腩飯」應該很好味,但就「色、香、味」的「色」來說,就略遜香港版本了。

    想是因應外國人餐飲文化,飯餸都工整地分開放在碟上,而餸汁亦過於清淡。

    食碟頭飯,要餸連汁一坺〈pat〉放在飯面才過癮啊。

    回覆刪除
    回覆
    1. 是的,碟頭飯應該是「料鋪飯面」比較好。

      刪除
  13. 火腩豆腐飯真是最正斗,雖然不太健康,但偶一為之,老妻亦網開一面。另一「賣飛佛」乃是鲜茄牛肉飯,當市面蕃茄價貴時吃它最低,有賺晒的感覺,澳洲的蕃茄又大又红,牛肉又嫩,撈白飯來吃真是美味。此外,涼瓜XX 飯(XX=牛肉、排骨、或火腩) 亦各有風味。

    回覆刪除
    回覆
    1. 鮮茄牛飯,就真是加蛋碎炒底更佳了。
      鮮茄汁獻加一些「地捫」茄汁、白醋、鹽、糖吊味,更開胃。

      刪除
  14. 我就較喜歡生炒雞絲飯和粟米肉粒飯。吃完剛剛飽,不會濟胃。輕鬆上班去也。
    豆腐火腩飯總給我很飽的感覺。

    回覆刪除
    回覆
    1. 如過是兩個人合食,整個「太極鴛鴦飯」也很好。

      刪除
    2. 「加底」定係「半賣」先?

      刪除
    3. 加底就是加飯不加菜,「半賣」是全碟飯菜減一半。

      刪除
    4. 不是啊。

      印象中「半賣」是指同一菜式的大份量版本。

      有一說「半賣」是一圍酒席十二人的一半,即六人份量。

      因應現實需求,感覺現今酒樓的「半賣」是正常份量的一倍半〈或兩倍〉。

      http://bbs.cantonese.asia/thread-30991-1-1.html

      http://blog.yahoo.com/_RRNT3BLBPNW3IJJFMHXX3JPAH4/articles/611289

      刪除
    5. 對,是酒席大碟的一半,比平常的個人碟頭大一點。

      刪除
  15. 我在 nz 讀書時午餐甚少食飯,多數食三文治,一係去賭場食平野為生..

    回覆刪除
    回覆
    1. 我是三文治久不久一餐則可,連續兩餐以上日話,完全不能下咽。

      刪除
  16. 你我這把年紀,一天最好不吃超過一顆蛋。

    回覆刪除
  17. 豆腐班腩飯也不錯可惜不是真的班腩若遲到真的班腩不便宜啊!

    回覆刪除
    回覆
    1. 澳洲中餐館的「斑腩」碟頭飯,大多是越南來的平魚Basa,價錢是真正石斑的六分之一。

      刪除
    2. 香港餐廳用紅魚腩充當班腩

      刪除
    3. 澳洲的石斑魚柳,急凍的都要賣40元一公斤呢。

      刪除
  18. 有人話無論你點移民,係移唔到個胃走,果然係真!

    回覆刪除
    回覆
    1. 不過,另一種說法,是移民後食大了個胃,像我現在常吃意大利餐、德國餐、越南餐....

      刪除
  19. Why are you still single, man?

    回覆刪除
    回覆
    1. 文章是說一般情況,不是講我自己。

      刪除
  20. 飽魚雞鵝鴨絲飯炒底加煙肉雙蛋蕃茄捆邊生菜墊底飯, 哈哈!
    http://www.youtube.com/watch?v=79bG4EhUdLk

    回覆刪除
    回覆
    1. 廿幾年前,香港最貴的碟頭飯是太平館的「太平館飯」,真的有一兩片薄薄的鮑魚,近100元。當年去「龍記」吃個扒餐,不過是三十元左右。

      刪除
  21. 豆腐火腩飯我都好喜歡食,不過唔知點解,係外國地方,好多時啲豬肉硬係有陣味,試過上唐人街餐館叫啲豆腐火腩飯,火腩肉就有種尿'喀'味。

    我本身不太喜歡乾掙掙食品,濕濕地多啲汁就啱我,所以豆腐火腩飯、魚香茄子飯(多汁)、福建抄飯、豉汁肉片豆仔飯...等等諗起都流口水,就算叫燒臘飯食都要加色或薑蓉打孖上,鍾意菜遠牛河多汁兜亂多過乾抄牛河。

    回覆刪除
    回覆
    1. 外國唐餐館的豆腐火腩飯的「火腩」,分分鐘是幾日前的,難免有股「益」味。
      豬公肉有陣「押」味,在所難免,不過買到不「押」的,是母豬肉選你好彩,據知有些豬場餵諸公食雌性荷爾蒙,食到牠們變太監。

      刪除