包二奶的喜劇和悲劇

喜劇：原文（世說新語）

溫平蜀，以李勢妹為妾。郡主兇妒，不即知之。
後知乃拔刃往李所，因欲斫之。
見李在窗梳頭，姿貌端麗，徐徐結髮，歛手向主，神色閑正，辭甚悽婉。
主於是擲刀前抱之：「亞子，我見汝猶憐，何況老奴？」
遂善之。

粵語意譯：


晉朝人桓溫，帶兵去平定四川既李勢，一二三重順手DAP埋人地個妹做二奶。
桓溫老婆係當今郡主，好鬼惡死，一日到黑GUP住佢有無去滾，初時重蒙查查。率之郡主收到風，拿拿臨就擸把刀踩上個二奶度，要斬開佢九碌。
郡主一去到，剛剛二奶響窗口側邊扮靚靚，睇真下原來真係好正！佢慢慢整好Ｄ頭髮，好似都未驚過，細細聲向郡主求情，聽到人地心都軟哂！
於是郡主丟低把刀，重撲上去攬住佢咁話：「你個靚妹仔丫，連亞姐見到你都俾你電親，咁又真係----唔怪得哂個衰佬既！」
之後，郡主重好鍚佢添。

悲劇：原文 (戰國策)

魏王遺楚王美人，楚王悅之。
夫人鄭袖知王之悅新人也，甚愛新人，衣服玩好，擇其所喜而為之；宮室臥具，擇其所善而為之，愛之甚於王。
鄭袖知王以己為不嫉也，因謂新人曰：「王愛之美矣，雖然，惡子之鼻；子為見王，則必揜子鼻！」
新人見王，因揜其鼻。
王謂鄭袖曰：「夫新人見寡人，則揜其鼻，何也？」
鄭袖曰：「妾知也……」
王曰：「雖惡，必言之。」
鄭袖曰：「其似惡聞君王之臭也──」
王曰：「悍哉！」
令劓之，無使逆命。

粵語意譯：

魏王送左個靚女俾楚王，楚王好鍾意佢。
知道楚王好鍾意個靚女，楚王個夫人鄭袖都好錫佢，有乜野靚衫同埋名牌野，都揀D最正既買俾佢；間屋點裝修法佢話點就點，直情錫晒，楚王都無佢咁誇張。
鄭袖知道楚王唔會再思疑自己有妒忌心，就找一日同個靚女講：「無錯，大王係鍾意妳，之但係佢最唔鍾意妳個鼻呢；妳見到大王個陣，記得遮住佢wor！」
果然靚女見親楚王，都遮住個鼻。
楚王搔晒頭，都唔知點解佢會咁，就問鄭袖：「靚女見親我，都遮住個鼻，點解？」
鄭袖：「我知就知，不過……」
楚王：「點都好，你唔怕講丫。」
鄭袖：「聽講話佢怕你個陣體臭呱──」
楚王慶過辣雞：「衰---婆丫！」
於是實行冇情講，叫人批左佢個鼻落來。

(文章允許轉貼，請具作者名字 梁煥松)