2015年3月20日 星期五

H3N2大難不死

維基圖片
以下這篇文章,是FB 網友 Ada Cheung的,(原文連結)轉載如下,以利大眾:


我已出院了。但未好返。謝謝大家關心。

我share以下details, 係希望大家使用公家醫療服務時, 能有個參考。要唔死的話, 大家自求多福。
____________________

11/3(三) 
因小便困難看普通西醫時, 懶冇戴口罩, 走後又忘記洗手, 隻手又不自覺擦眼擦鼻。

12/3(四) 
鼻水不停。自己一日食8粒Piriton, 還是沒用。

13/3(五) 
早上最高燒至103°F = 39.4°C
鼻水繼續, 全身痛……

自己除了Piriton, 再加一日食8粒Panadol, 再加24小時內喝了8公升水, 以助退燒。

下午, 看街症, 還是開了Piriton和Panadol比我, 除了多咗我屋企都有的抗生素外, 其他冇分別, 叫我食的份量, 還比我食緊的份量少成倍。

我因太辛苦, 問醫生我要不要入院?佢話隨便我。我再問, 那會不會是中了最近死了很多人那隻流感?要入醫院check吓嗎?佢又話我鐘意。我問, 那可否給我寫張轉介信隨時去急症室/入院?佢又話唔駛轉介信。fine, 我當冇睇過。

14/3(六) 
早上 100°F = 37.8°C
燒表面上是退了一點, 但食住抗生素、Piriton、Panadol 的情況下, 身體情況反而更差, 之前一晚每隔個幾鐘, 就因呼吸困難醒一醒, 完全不能睡、鼻水咳繼續、頭痛、全身骨劇痛、喉嚨像被火燒、呼吸時氣管和肺痛、吞口水耳仔痛、還間中發冷。

我開始覺得好唔對路………

1) 我很少發燒, 燒到103~104, 更加係近20~30年未試過。
2) 普通發燒, 食panadol, 狂隊水, 8粒鐘內必會退燒。但我只係退咗啲, 始終未退晒。有乜可能每日隊8公升水都退唔到燒?冇可能!
3) 普通病邊有咁辛苦㗎?辛苦到個幾鐘抖唔到氣醒一醒!?

突然醒起, 若甲型流感H3N2, 要食特敏福要病發後48小時內食, 一過咗, 就食都冇用, 隨時成為那380個死者之一。計一計, 就嚟過鐘!大驚!我決定執埋日用品, 向東涌急症室奔去。

傍晚, 去到急症室, 不論分流站或醫生, 再三用耳探機量體溫, 都說我沒有發燒!?我出門口前還用口探過數次, 是37.5~38.1°C, 怎會突然沒發燒!?我質疑醫生的耳探機壞了, 醫生再用不同的耳探機替我試了好幾次, 還是告訴我沒發燒, 想開Panadol和抗生素給我便打發我走。

我開始心想, 是不是耳探和口探的variations?我上網查, 原來口探比耳探準確, 耳探會比實際體溫還要低攝氏半度。即係, 發燒的指標 --------
口探: 37°C = 98.6°F
耳探: 36.5°C = 97.7°F
那耳探更加冇可能冇發燒呀!

不理有冇發燒, 我已經唔舒服到, 行都行唔穩, 隨時暈低。我表明我已食了48小時Panadol、 Piriton、抗生素, 但情況轉壞, 你再開返相同藥比我做乜?!我堅持入院check係咪H3N2甲型流感和接受治療, 但醫生說我毋須檢驗, 仍無視我一切臨床病徵, 繼續想打發我走, WTF!。呢個時候, 我諗起呢單新聞: http://hk.apple.nextmedia.com/news/art/20150207/19032763

醫生問我三個問題, 1) 你最近有冇返大陸?冇。 2) 你有冇接觸活雞? 冇。 3) 你有冇接觸雀鳥?……… 我知道, 最後一題, 若我再答冇, 佢真係會好似上面單新聞咁, 唔會收我入院。我答: 同雀鳥玩算唔算接觸㗎?
醫生: 吓?點玩法?
我: 咪餵吓佢地咁囉。
醫生: 嗱, 若真係當你有接觸, 咁會好大鑊㗎!我會懷疑你有禽流感或相關變種, 咁會安排你入瑪嘉烈進行隔離。你係咪sure答有接觸?
我(心諗: 咪低能!就係你唔收我入院, 我至要咁答之嘛!): sure. 有接觸。
醫生: 咁我安排救護車送你去瑪嘉烈。

安排中, 護士和救護員反覆再和我耳探體溫和紀錄, 我仍好奇, 於是索取那個2小時內探了N次的紀錄看。一看, 全是攝氏37點幾至38點幾, 那不是發燒是什麼!?我問他們, 「咁唔係發燒呀?」他們答:「唔算。」WTF! 爭論了一輪發燒冇發燒, 到頭來, 原來係大家的標準根本唔同!!!咁到底要幾多度, 政府至會當發燒!? 政府點解會癲到自創一套世衛以外, 發燒的體溫準則!?我冇出聲, 我已冇力出聲……

救護車內, 和抵達瑪嘉烈時, 他們也用最高的防禦規格, 就像是我身懷外星細菌。儍的嗎?體溫、病況、臨床診斷、病人感覺、要暈倒了……如何都不能把你送進公家醫院, 但只要答「對」一條問題, 你就能獲獎勵給送進院, 給好好正視你的病。這是常識問答比賽嗎?這香港真的瘋了。

15/3(日) 凌晨 
入到隔離病房, 我已再沒多餘體力, 神志開始不清………卻被兩位姑娘不停凶我, 「你點樣玩雀呀?」、「幾時玩過呀?星期幾呀?」、「點餵呀?用咩餵呀?」、「幾多隻雀呀?」、「咩雀呀?啲雀咩色㗎?」、「喂!撐大隻眼呀!答我呀!唔好暈住呀!」………… 我已經唔記得自己那刻有冇答, 答咗啲乜………
姑娘離開房間一會。過了不久, 醫生入來、姑娘入來抽鼻液, 終於比咗粒特敏福我, 終於趕得切發病後48小時內食到。我可以休息了。

15/3(日) 
上午, 醒來後, 我用自己帶的探熱針, 口探仍然是攝氏38點幾。但唔緊要, 我已神奇的好了很多。可能之前給抽走了鼻水, 不致會抖唔到氣醒來, 終於好好的睡了幾個鐘, 頭痛、全身骨痛、喉嚨痛、氣管痛、肺痛、耳仔痛的情況全部有改善, 再繼續食特敏福和抗生素。而醫院, 也繼續同我耳探後, 也是繼續根據唔知咩標準, 話我冇發燒。

16/3(一)
上午, 醫生話我聽, 確診是甲型流感H3N2。沒有禽流感、沒有豬流感、沒有變種。

嘩!頂!好彩我入得院快, 食特敏福食得快, 否則隨時命仔不保!好彩我响東涌急症室堅持我玩雀啫, 否則若當時聽佢講打發我返屋企, 我咪隨時已經死Q咗!!!執返身彩!!!

我開始懷疑, 那死去的380人, 是否都是死於政府的延醫診治?我明白, 可能驗H3N2成本高、可能特敏福這藥又貴又少, 但你都唔可以草菅人命嘛! 你唔夠資源的話, 你開聲叫人去私家驗丫!去第二度買特敏福丫! 若你永遠响48小時特敏福的關鍵時間內, 只要答「錯」問題就唔收人入院唔比特敏福; 但48小時後下下要病到器官衰竭至收人入ICU, 咁請問有乜意思呢? 政府真係靠唔住!真係信佢一成, 雙目失明!!!

同日夜晚, 由單人隔離病房, 佢漏夜推了我去4人隔離病房。我真係唔明, 唔怕我傳染人嗎?我隔離床個女仔, 咳到甩潤。我怕得睡覺也戴著口罩。

17/3(二) 
口探 37.8°C
早上, 醫生突然話, 我白血球開始回復正常, 對特敏福反應良好, 突然叫我出院!!!???
P佢個K!都未好返晒, 燒又未退, 呢頭確診完H3N2, 嗰頭做乜突然pan我走!?

我問我要否自我隔離, 醫生問我住的地方有冇其他人, 我話冇, 佢話咁唔駛啦!心諗, 吓?咁兒戲?唔驚我响社區播毒㗎!?但因為隔離個女仔咳到甩潤, 安全計我也不宜久留。算!走!

帶住佢開的特敏福, 返到屋企, 經過一日舟車勞碌和街的癈氣, 又升返, 38.3°C!呼吸又開始困難!真係想講粗口!

......................................................

6 則留言:

  1. 妙文!聯想到以前報章上講综援人士濫用醫療,(佢地唔講大話點 "濫用" 到?????) 真係異曲同工。幸好今次係有真需要,亦提醒我地呢啲 "擔 x 都唔識偷食" 的,要識得應變。

    祝 Ada 小姐 日日健康,遠離政府架構,因為個政府真係癈嘅。

    回覆刪除
  2. 如果全是真的,佢遇到的醫生係要斟酌,但呢位小姐的做法亦不可取,感覺是自作聰明的病人

    回覆刪除
  3. 香港一切都晤平𧗾,人多了,但配套完全跟唔上,所以各有關部門自行調整標準,大家只能睇餸食飯,怪誰,一家餐館申請牌照,食物衛生局當然要審核,整體設計,空間多大,外面停車場能泊幾多部車,廁所的廁位數量等等,才枇準開業並限制人數,現在政府的人每每呌市民依法依法,但佢自己呢!

    回覆刪除
    回覆
    1. "現在政府的人每每呌市民依法依法,但佢自己呢!"

      What is your point ?

      刪除
  4. 係咪真人真事? 係咪真係甲型流感H3N2? 有冇入院出院或其他證明?

    回覆刪除
  5. WTF is this, man...say it, man...

    回覆刪除