2015年3月21日 星期六

唔聲唔聲嚇你一驚

睇下左邊圖片呢個男仔,個名係Jake Bilardi,係澳洲墨爾本一個18歲中學生,好眉好貌,有邊個會估到佢會係「聖戰」恐怖分子?

中東自稱咩「伊斯蘭國」,殺人放火,姦淫擄掠,作惡多端,係人都知矣。而家俾佢哋霸咗一批油井,搶咗幾間銀行,正係水頭充足,有排玩。呢班衰人最估佢唔到者,係利用網絡來吸引身在外國的支持者,自動參加恐怖活動,有的係瞞住家人,自己飛過去歸隊,有的就係本地搞破壞殘殺無辜平民,隔幾日就有一單,直情防不勝防。

一路以來,都係聽到有啲移民西方國家嘅中東或南亞裔,第一代或第二代人,在新國家感覺「被邊緣化」,格格不入,於是仇恨西方文化,覺得都係班包頭佬親切D,先至會受煽動。但係呢個Jake Bilardi,明明係澳洲土生土長白人,點解會咁戇居,肯去揸架四驅車自殺式炸彈襲擊伊拉克政府軍?


隔一陣就有一單無端端係街上開槍射人,或者用刀斬人,殺既都係同兇手三唔識七,無冤無仇,即係為殺而殺來過下手癮者,你咪以為兇手梗係平時脾氣暴躁、兇神惡煞、蝦蝦霸霸嘅嘅惡爺,事實上好多時啱啱相反。好似前幾年日本秋葉原有條死靚仔,去年台灣捷運火車上個大學生鄭捷,連續斬殺數人,都係平日沉默寡言,性格內向既人,一做就做一單杰撻撻嘅,唔聲唔聲嚇你一驚,過後講話有紋有路,但係全無悔意。

老老實實,若果心理調查報告,話佢地係黐線,控制唔到自己嘅行為,法庭判佢哋罪名不成立,咁就真係天無眼矣。

講返呢條澳洲仔,出生中產家庭,身材瘦蜢蜢,平日講話陰聲細氣,性情怯懦,係學校長期被人恰,笑佢長頭髮,叫佢做「耶穌」添。可能正因為咁,佢慢慢滋生仇恨他人心理:恰我吖嗱?實行整煲杰嘢俾你嘆!

佢嘅家庭並非信伊斯蘭教,根本係唔信教嘅。佢係社交網絡有好多留言,一路留到進行自殺行動,顯示出佢點樣受到恐怖分子影響,產生仇恨美國以及以及其盟友澳洲,認為兩個國家蛇鼠一窩,抵死有餘,佢又點樣願意為真神阿拉做死亡戰士。

最恐怖者,係佢講明佢 Plan A係去伊斯蘭國做聖戰士,如果去唔到呢,Plan B 就做土製炸彈,係墨爾本整一劑大爆炸,殺澳洲人咁話。你咪當佢講下就算,事後警方發現,佢真係有收集製彈資料,並且有購置化學物品。

佢去到伊斯蘭國,由於係白人,又唔識講阿拉伯話,一樣俾人排擠。我諗或者會係佢諗住搞一壇最慘烈嘅嘢,自己請纓去做自殺式襲擊嘅。

再係咁搞法,呢亭土產恐怖分子,真係好似社會嘅癌細胞一樣,唔知道幾時又出一件,會唔會自己隔籬屋就有一條黐線仔?真頭痕。

.......................................................................

*倘有留言未能即時上板,是自動過濾去了spam之故,諸君稍安無躁,版主每日檢查幾次,

一有發現便會救回*


(文章允許轉貼,請具作者名字:梁煥松)

14 則留言:

  1. 少年十五二十時,如果無人作適當的引導,好容易會諗埋一邊,誤入歧途,此所以有那麽多年青人自殺、吸毒、缓交、打人、甚至殺人的事發生。三字經說「養不教,父之過,教不嚴,師之惰」,現在人人顧住揾食,虧缺了關壞子女和学生的時間,任由幼苗轉化成為毒草,卒之害人害己。請看近日兒子謀殺父母分屍之一案,可引以為誡。

    回覆刪除
  2. 「男盗女娼亅幾乎係無神論間接容許及正常化之物。「伊斯蘭國」就更進一步演進到「殺人者可上堂亅,違反所有主流宗教的教義及人類價值觀。加上殺戮式的電子遊戲影響青少年人嘅心智,(真實的殺戮,直頭好玩過 war game 啦!) 咪話人類係在進步中。唔出聲的,都有機會係共犯。

    回覆刪除
    回覆
    1. 持無神論不等於無道德觀念。
      只是不怕道德觀念建基於神靈,可以是建基於公益、仁愛、實效等等。
      孔子有一套完整的道德觀,但是他的宗教觀念很薄。
      無神論容許男盜女娼?更是無從說起。

      刪除
    2. 因為無 "報應觀",無神論 "包容" "有道德" 與 "無道德" 雙重概念,視乎個別 無神論者 的道德取向,「男盗女娼亅是其中一種取向。但 有神論 多有 "特定" 道德範圍。是故 無神論者 於道德上,有較大空間去遊走。

      刪除
    3. 試想想一個純基督教國家,有否需要考慮將娼妓合法化,或引入賭博事業?會否有人需要以偷盜為生?故此,當一方倒下,另一方便有機會豎立起來。

      刪除
  3. 澳洲的左膠太多了 , 但這是較少有的例子 , 走偏激路線的左膠 , 不跟大隊高唱 " 包容不歧視 " , 報應 !

    回覆刪除
  4. 叫英美澳d家長乘機處理下d校園欺凌事件, 教佢地d仔女如果蝦人蝦得太甘, 人地發起惡上黎就會殺佢地最愛嘅人

    回覆刪除
  5. 年輕人最容易被人洗腦, 中共深明此理, 自小就向學生大量灌輸愛黨愛國教育, 舉行升旗禮, 唱愛國歌曲, 將國家及黨領導形容為父母, 甚至比父母更親, 這種洗腦教育十分成功, 大陸人大都成為盲目愛國愚民, 即使取得外國國籍仍依然非常熱愛祖國, 至於愛黨, 則尚有不少改進空間.

    回覆刪除
  6. 人類歷史已進入失控階段,文化、宗教、歷史經驗似乎不會有效带領人類走向坦途。

    回覆刪除
  7. 魔鬼是如何練成的?請梁 Sir 參考閣下文章 "3分鐘論文"的留言。在下在該處已指出比賽冠軍者的論文謬誤。試思考為何其 supervisor 看不出其論文的謬誤及實驗設計的不公正處,更容許其公告論文 "撮要"?該 supervisor 的學術背境及能力為何?再思考一下若果冠軍者依其論文再發表更多 "簡體字 vs 正體字" 的論文,將原論文的謬誤重重淹埋,並高呼 "簡體字比正體字更優勝" 並要求在香港全面取締正體字,那將會對華人文化產生如何大的災難?

    從來洗腦文章都內藏邏輯謬誤。因此,邏輯工具將會是二十一世紀人類文明的救贖工具。

    回覆刪除
  8. any time elsewhere there must be someone who fg wants to just "do something" instead of waiting for free lunch, man...fundamentalist extremists we call them may want to resort to "violence" any fg time that will impact on others...but, who and what fg allow them to fg have any excuse to do it in the first place, man...fg strongly believe that, in their view, the fg US and int'l capital imperialism etc., should be fg responsible for this, man...discuss...

    回覆刪除
    回覆
    1. Someone is getting big free lunch by stirring up conflicts with US & the "capital" world through lies. [ Even the Is*m religion started with lie(s), meaning that its root is "路西弗", who thus has the opportunity to put violent and evil thoughts into people's minds. Likewise to Communism and Atheism. When someone tries to bring down Christianity and other religions, welcome to the Is*m dream ! ]

      刪除
  9. 文革的時候,毛澤東在東西方世界也有很多粉絲。現在想來,真是難以置信。

    回覆刪除
    回覆
    1. 這個世界,什麼人都有。

      刪除