2015年6月25日 星期四

移民到步經驗談 4

移民到步經驗談 4(買車)

踏足澳洲的第五天,我便買了車,不過是做了老襯。

朋友S君介紹我到一間Toyota經銷商,由於可以乘火車直達,於是欣然前往睇車去也。

在香港,新車都是由入口商自設門市部,澳洲則是入口商不做這套,而是給全國數不清那麼多的經銷商代為售賣。每一間車行的經營和宣傳手法、定價之上給予折扣不盡相同,個別經銷商也能夠同時銷售其他牌子的汽車。

新車之外,他們還會售賣客人Trade-in的舊車,牌子款式五花八門,定價更是無甚準則。沒經驗的買家,進去澳洲的車行,花多眼亂、目迷五色,不容易作出最具成本效益的抉擇。


我計劃先買一輛比較新淨,一兩年新的二手車;因為人生路不熟,有碰撞也不會太傷心,價錢也會節省一點。售貨員知道我的要求,先給我試駕一輛兩三年新,澳洲製造的4000 cc 福特Falcon,我在香港有十幾年駕駛經驗,但是最大只開過1600cc的Honda Accord, 未開過這麼大的車,雖然跑直路十分過癮,但怕轉彎抹角和泊位「舞佢唔掂」。

再試一輛 1600cc的自動波 Toyota Corolla,不足一年車齡,還剩下一年多的原廠保用。日本小車的操控,其實每一輛都差不多,只覺得心應手,問下價錢,經紀開價 20500澳元。

我約略估計,比買全新的便宜三四千元,買得過,於是說好的,我要。

奉勸各位,在澳洲買東西,尤其是買車和買屋,一定不要急,一於與賣方鬥耐性討價還價,你不肯賣,我就過你的對手那裡睇下先。沒有鐵價不二這回事,就算在像香港「連卡佛」規模的大百貨公司,一樣可以講價。

我不知風俗,本性也不擅長講價(經過多年磨練,現在已是箇中能手)。倒是那個經紀良心發現,說你這麼爽快決定,我願意減價1000元,19500元賣給你!

還以為行好運,遇上老實人,給了訂金,留下個人資料。翌日去銀行買張付清餘額的銀行本票,坐火車去車行取車,看過車身沒有損傷,貨銀兩訖,車輛轉名手續已經辦妥,就把車開回北區暫住的地方。當晚就撿兩件輕便行李,不靠地圖,看路標指示直往南走,和太太輕鬆到達100公里外,香港人熟悉的「黃金海岸」市玩了三天。

這輛車開了一年,沒出過什麼問題,算是可靠好用;但是到我Trade-in它買另一輛Mazda新車時,才知道我是買了一輛 Lemon(澳洲英文,「水嘢」之謂也)。

Mazda車行職員一按電腦,問「你的車在那裡買的」?我說 Toyota的經銷商呀。他們說,這輛車一落地,便是一輛租車公司名下的車,所以一年未夠,到你手時便跑了20000公里啦。你知道嗎,租車的機械損耗特別高,因為租車的人不甚愛惜,狂衝狂剎車的很常見,所以ex-rental cars 的車價,貶值得特別厲害。

換言之,我這輛車,起碼買貴了二千元。這個差額,在Trade-in時充分反映,車行只以14000元收車,真是經一事長一智了。

(明日續)
。。。。。。。。

*倘有留言未能即時上板,是自動過濾去了spam之故,諸君稍安無躁,版主每日檢查幾次,一有發現便會救回*


(文章允許轉貼,請具作者名字:梁煥松)

13 則留言:

  1. 梁兄:
    你係超老實人,
    在美國啲車行全部被啲大袋控制,消費者永遠係輸家,佢賣得比你佢肯定有錢賺,賺錢唔緊要還編段古仔呃梁兄,說什麼原來的二手車公司拿出來,怎20000公里攞出嚟,租車公司自已有維修隊,在美國大約四五萬英哩才攞出嚟自己賣,有幾個月的保養,租車四五萬英哩大約係兩年車左右,你哋去車行買,經紀仔同你試車,報個價你,會有啲位走,如果你唔滿意,佢呌你等,通常等十幾分鐘領個SUPERVISOR出嚟,又重新開始計數,如是者OVER AND OVER再等再領主管及經理出嚟,悶到你心煩咪中計,佢吔有人有時間。
    我自己有啲心得,唔好買車行的二手車,在美國佢吔係一LOT 一LOT咪投番嚟,好的trade in車自己職員可以原價購買(每年限一兩部),買新車先上網了解行情,及廠方折扣或優惠,有時減三五千有時免息,有時借錢又減啲,你咪借佢錢,攞咗佢啲好處,然后三個月後還晒,咪唔使蝕息,又唔罸息,以前中國人買車用現金,大大聲呌佢多比啲好處,依家無用啦,你借錢供車,財務公司有水回比車行的。
    日頭去試車,聽吓報價,知道個底,再了解,下次再嚟,揾月尾佢哋計算QUOTA同廠方對數,有時候要配合QUOTA爭取上一級的折扣,那段時間會㩒價搶單,還有在他們下班前去最正,唔洗比佢拖時間。
    最後你有目的物的話,不要踏入門市部,打電話到批發部,佢吔無經紀及經理,跟那位經办人交手(佢係月薪的,無佣金), 上網查看廠商發票價,照發票價付欵就最公道(佢哋都有錢賺),這十年內我的車都系揾批發FLEET部門唔使煩。

    回覆刪除
  2. 梁兄:
    文章一長啲就飛走。

    回覆刪除
    回覆
    1. 多謝耐性。

      刪除
    2. Mazda經紀沒有騙我,
      Toyota賣車條友,有講過架Corolla的上手是 Avis租車公司,
      不過輕描淡寫,我亦唔知頭唔知路,不以為意。
      如果我是熟門路的,就會同佢講價叫低5000,還價15500,再同佢慢慢磨。

      刪除
  3. 梁兄:
    新車落地三個月最少唔見三四千,一年車减得三四千,這是他們銷售的策略,車行內沒有多少係好人,賺埋人啲無奈錢,如果出租車一年只用20000公里,即係12,000英哩,用得好少,唔似租出街,可能係經理車,以前車行啲經理都有經理車,用半年大約六千英哩左右當新車,最少平三千,因為掛T字牌未出過牌部,我架車每年都用成20,000英哩以上,LEMON 車意為短時間內經常返廠整,我太太試過,出咗部車三日去到FREE WAY口唔郁得,佢話同我哋整番,我話唔得,晚上七點鐘衝去同佢哋講數,最後放工八時前換過部新車給我們,原來佢哋啲文件要十日后才送去運輸署,新車七日內有問題係可以換的,買新車七日內用多啲試吓車,但唔好谷架車。
    在美國舊車可以睇BLUE BOOK或上網查核時值,熟人的二手車才好要。
    對不起澳洲情況可能有別。

    回覆刪除
  4. 北美有 lemon aid report for USED cars
    若每三年有新車用 租購 leasing 也不失為好方法
    自己車要惜著揸 三年回車 可以盡量揸
    里程用到盡 穿州過省 揸遠程由
    NYC 去到 三藩市 由 溫哥華 返去 Ottawa
    買車用到十年條數可能平些 但車一舊過三年
    問題就陸逐有來 花精神花時間

    回覆刪除
  5. 似乎LEASE 車已經唔合潮流,出車又要先一筆頭欵,然後每個一筆租金,三年期限內用咪數(大約10,000 - 15,000 咪),到期超咪數要補錢(大約$0.15每咪),到期可以BLUE BOOK價贎回,啲車啇數口叻到絕,用家那有大着數,回購后你穿州過省梗無問題,車啇又話你可以省啲稅,只需付出多少就按數交消售稅。
    車行TRADE IN 車價比自己賣平十多廿個%以上,好處係干手凈腳,及你買新車時只需付差價的稅,西雅圖的華盛頓州及OREGON州都無消售稅,咁咪可以省回一成的稅欵。

    回覆刪除
    回覆
    1. Avis 那些不是長期租約,而是租給遊客開幾日那種,咪數多又殘得快。

      刪除
  6. rental 與lease的分別為短與長,公寓APARTMENT門口楝個牌 RENT AND LEASE就有此分別,伹租鋪位好少比你RENT(短約),一定要你薟LEASE(長約),AVIS係CAR RENTAL啇,租一日兩曰一個星期及一個月個只,租購車(LEASE) 係車行的生意,到期攞出嚟賣,唔呌二手車,呌PRE-OWNED或FACTORY PRE-OWNED。

    回覆刪除
  7. 對不起個名應仲串啲 FACTORY CERTIFIED PRE-OWNED服未,因為車行係代表車廠LEASE部車給你,全部係班司爺律師搞出嚟!

    回覆刪除
  8. 對不起,就算是得罪人我都要说,世上最奸滑最冇人格的職業叫做 used cars salesmen,未成交之前好話说盡,扮老友,成交後反轉猪肚不識人。你最多幾年才換一部車,他日日買車賣車,試問你怎夠他鬥?所以我一定換新車,費事買埋他人的 problems,谷氣兼给老婆怨。

    回覆刪除
  9. 汽車買賣唔識實俾人呃,好似買電腦咁...
    我對車一無所知,所以買車一定俾人呃

    回覆刪除