2015年2月23日 星期一

生肖得啖笑

新春伊始,總有星相命理風水師,於電台及文字媒體,侃侃而談「屬X人士在今年運程」,十二生肖,肖龍肖蛇、肖虎肖羊,際遇各有不同。讀者及聽眾,咸以有大師免費贈幾句,寧可信其有,睇下自己本年運氣如何焉。

十二生肖,乃係根據出生年嘅天干地支地支而定,例如今年「乙未」,未屬羊,故為羊年,餘類推。

命理之道,博大精深,但要根據本人年、月、日、時四項之天干地支,所謂「八字」資料來推算,再比對今年之天干地支,計算生剋制化、陰陽喜忌、出現何等吉星煞星,方能有比較確實推論。斷無單憑年支一項,就能夠大談今年吉凶之理。

講到尾,正所謂同人唔同命,又點會只得十二種咁少乎?

如果只係講睇生肖所屬,性格命運就會點點點,咁就真係「老點」你者也。

手邊有本2013年粵劇「錢塘金粉」演出特刊,裡面有篇文章,是編劇(亦是知名命理學家)李居明寫嘅,其中一段就認真搞笑矣。以一個咁有名氣嘅命理大師,居然會有如此觀察,令人百思不得其解.........


試想自己讀中小學時的同班書友,大家年齡相若,絕大多數係同一生肖,比如我的同班,大多數是屬馬,性格當然是各有不同,同年考試有人考第一有人考第尾,會考時有人進名校有人名落孫山,之後一生命運,亦有如南轅北轍也。

講到某一年嘅運程,要幾唔同有幾唔同,有人發到唔清唔楚,有人投資失利損手爛腳,有人辦喜事,有人辦白事,有人犯官非。我記得前幾年,同班校友有人自殺、有人早逝,令人不勝唏噓。

影響一個人嘅遭遇,有好多因素,點會話憑生肖就講得中?呢D根本係常識,無得拗者也。
。。。。。。。。

*倘有留言未能即時上板,是自動過濾去了spam之故,諸君稍安無躁,版主每日檢查幾次,一有發現便會救回*  

(文章允許轉貼,請具作者名字:梁煥松)



18 則留言:

  1. 生肖運程得啖笑,不用理會!

    小弟和兄都肖馬,但運程就相差很遠了!

    回覆刪除
    回覆
    1. 豈敢豈敢。
      老兄之海景家居,小弟所艷羨也。

      刪除
    2. 海景去年給新建的酒店阻擋了!

      刪除
  2. 大師乃雞嗚非狗噏

    回覆刪除
  3. 而家啲神棍都唔剩係過年先浦頭,麥玲玲蘇民峰李承澤呢啲輪流上電視,幾乎晚晚打開電視總會見到佢地是但一個。

    回覆刪除
  4. 做節目編審搜集資料的人員,例行公事耳,容易做。

    回覆刪除
  5. 命理星相占卜是十分準確的 , 如果實際遭遇差得太遠 , 你要問下自已做過乜陰騭事 , 那是個人的修行問題 , 這又叫做上天給予人的自由 , 所謂奸有奸輸

    回覆刪除
    回覆
    1. 十分?算命先生有八成準確已經很厲害的了。
      如果實際遭遇差得太遠,還有可能是你找的算命先生太水皮。

      刪除
    2. 好想知道 x承責 知唔知道自己會離婚? 佢的第一任在結婚前,又知唔知道佢知唔知道會離婚 收場? 當年 林x雄 又知唔知道自己會中風...?

      刪除
    3. x承責 知唔知道自己會離婚?
      自已為自已算命是要打折扣的 , 所謂靈機受自已欲念所蔽塞 , 隨非是道行極高的修行人 , 但這些人極少 , 又通常不會以此求財貨 , 坊間的 " 大師 " , 當是娛樂表演人吧

      刪除
  6. 可惜神棍當道, 真假難辨, 劣幣驅逐良幣. 我唔想預知未來, 知嘅話行為會變, 預知嘅事就唔會發生; 如果話預知嘅事情點都阻止唔到, 禁就知黎做乜?

    回覆刪除
  7. 盡信書衰過無書多多聲。
    盡信人實俾人搵一世笨。
    盡信自已遲早害死自已。
    世上一切總有一條道理。
    亂嗡一通都會笑死自已。
    名位新春新年一團和氣。

    回覆刪除
  8. Francis下午2:14

    總言之,有早知,無乞衣。

    回覆刪除
  9. 如果人性係單憑星座命理占卜就可以安樂人生,唔難想像人會變得愈來愈自私,世界會愈來愈亂。

    回覆刪除
  10. 命理係準的,但必先要有時辰八字才行。否則人的運勢豈會只有十二種?

    回覆刪除
  11. Simon CHEUNG (HK)上午3:26

    生肖運程,胡說八道,不足信也!

    回覆刪除
  12. Have you guys notice that those recent 侃侃而談「屬X人士在今年運程」 so called experts look like a CEO and are much younger than before. Why ? Because of superstitious people "fatten up" their wallets.

    Rosemary

    回覆刪除
    回覆
    1. I hate these guys (and a piggy lady with MAx as family name).

      刪除